ਪਹਿਲਗਾਮ ਹਮਲੇ ਤੋਂ ਬਾਅਦ ਭਾਰਤੀ ਫੌਜ ਐਕਸ਼ਨ ਵਿੱਚ ਹੈ ਅਤੇ ਪੁਲਿਸ ਵੀ ਇਸ ਵਿੱਚ ਉਸ ਦਾ ਸਾਥ ਦੇ ਰਹੀ ਹੈ। ਸੁਰੱਖਿਆ ਬਲਾਂ ਦੇ ਜਵਾਨ ਆਦਿਲ ਅਤੇ ਆਸਿਫ਼ ਸ਼ੇਖ ਦੇ ਘਰ ਸਰਚ ਓਪਰੇਸ਼ਨ ਲਈ ਗਏ ਸਨ। ਇਸ ਦੌਰਾਨ ਉਥੇ ਸ਼ੱਕੀ ਸਮਾਨ ਵੇਖਣ 'ਤੇ ਖਤਰੇ ਦਾ ਅਹਿਸਾਸ ਹੋਇਆ। ਸੁਰੱਖਿਆ ਬਲਾਂ ਦੇ ਜਵਾਨ ਇਹ ਦੇਖ ਕੇ ਤੁਰੰਤ ਪਿੱਛੇ ਹਟ ਗਏ, ਤੇ ਉਸੇ ਵੇਲੇ ਵੱਡਾ ਧਮਾਕਾ ਹੋ ਗਿਆ। ਇਸ ਧਮਾਕੇ ਵਿੱਚ ਘਰ ਬੁਰੀ ਤਰ੍ਹਾਂ ਨਸ਼ਟ ਹੋ ਗਿਆ। ਪੁਲਿਸ ਦਾ ਕਹਿਣਾ ਹੈ ਕਿ ਘਰ ਵਿੱਚ ਵਿਸਫੋਟਕ ਸਮੱਗਰੀ ਮੌਜੂਦ ਸੀ, ਜਿਸ ਕਰਕੇ ਇਹ ਧਮਾਕਾ ਹੋਇਆ।

ਆਦਿਲ ਨੇ 2018 ਵਿੱਚ ਲਈ ਸੀ ਆਤੰਕ ਦੀ ਟ੍ਰੇਨਿੰਗ –

ਆਦਿਲ ਥੋਕਰ ਲਸ਼ਕਰ-ਏ-ਤੋਈਬਾ ਦਾ ਅੱਤਵਾਦੀ ਹੈ। ਉਸ ਨੂੰ ਆਦਿਲ ਗੁਰੀ ਦੇ ਨਾਮ ਨਾਲ ਵੀ ਜਾਣਿਆ ਜਾਂਦਾ ਹੈ। ਆਦਿਲ ਬੀਜਬੇਹੜਾ ਦਾ ਰਹਿਣ ਵਾਲਾ ਹੈ। ਉਸ ਦਾ ਘਰ ਧਮਾਕੇ ਵਿੱਚ ਉਡਾ ਦਿੱਤਾ ਗਿਆ। ਪਹਿਲਗਾਮ ਹਮਲੇ ਵਿੱਚ ਆਦਿਲ ਦਾ ਨਾਮ ਵੀ ਸਾਹਮਣੇ ਆਇਆ ਸੀ। ਉਸਨੇ 2018 ਵਿੱਚ ਕਾਨੂੰਨੀ ਤਰੀਕੇ ਨਾਲ ਪਾਕਿਸਤਾਨ ਦੀ ਯਾਤਰਾ ਕੀਤੀ ਸੀ। ਦਾਅਵਾ ਕੀਤਾ ਜਾ ਰਿਹਾ ਹੈ ਕਿ ਉਸਨੇ ਪਾਕਿਸਤਾਨ ਵਿੱਚ ਅੱਤਵਾਦੀ ਟ੍ਰੇਨਿੰਗ ਲੀ ਸੀ। ਉਹ ਪਿਛਲੇ ਸਾਲ ਹੀ ਜੰਮੂ-ਕਸ਼ਮੀਰ ਵਾਪਸ ਆ ਗਿਆ।

LOC ਨੇੜੇ ਪਾਕਿਸਤਾਨ ਵੱਲੋਂ ਗੋਲੀਬਾਰੀ –

ਪਾਕਿਸਤਾਨ ਆਪਣੀਆਂ ਕਰਤੂਤਾਂ ਤੋਂ ਬਾਜ਼ ਨਹੀਂ ਆ ਰਿਹਾ। ਉਸਨੇ LOC ਦੇ ਕੁਝ ਹਿੱਸਿਆਂ ਵਿੱਚ ਗੋਲੀਬਾਰੀ ਕੀਤੀ। ਭਾਰਤੀ ਫੌਜ ਨੇ ਭੀ ਉਨ੍ਹਾਂ ਨੂੰ ਮੂੰਹਤੋੜ ਜਵਾਬ ਦਿੱਤਾ ਹੈ। ਹਾਲਾਂਕਿ ਕਿਸੇ ਤਰ੍ਹਾਂ ਦੇ ਨੁਕਸਾਨ ਦੀ ਕੋਈ ਖ਼ਬਰ ਨਹੀਂ ਹੈ। ਪਹਿਲਗਾਮ 'ਚ ਹੋਏ ਅੱਤਵਾਦੀ ਹਮਲੇ ਤੋਂ ਬਾਅਦ ਸਰਹੱਦ 'ਤੇ ਤਣਾਅ ਦੀ ਸਥਿਤੀ ਬਣ ਗਈ ਹੈ। ਭਾਰਤੀ ਫੌਜ ਵੀ ਹਾਈ ਅਲਰਟ 'ਤੇ ਹੈ।

ਸ਼੍ਰੀਨਗਰ-ਉਧਮਪੁਰ ਜਾਣਗੇ ਭਾਰਤੀ ਫੌਜ ਦੇ ਮੁਖੀ –

ਸਰਹੱਦ 'ਤੇ ਤਣਾਅ ਭਰੀ ਸਥਿਤੀ ਦੇ ਦਰਮਿਆਨ ਭਾਰਤੀ ਫੌਜ ਦੇ ਮੁਖੀ ਉਪੇਂਦਰ ਦਿਵੇਦੀ ਸ਼੍ਰੀਨਗਰ ਅਤੇ ਉਧਮਪੁਰ ਜਾਣਗੇ। ਉਹ ਜਲਦੀ ਇਥੋਂ ਰਵਾਨਾ ਹੋਣਗੇ। ਜਨਰਲ ਉਪੇਂਦਰ ਦਿਵੇਦੀ ਸੁਰੱਖਿਆ ਏਜੰਸੀਆਂ ਦੇ ਅਧਿਕਾਰੀਆਂ ਨਾਲ ਮੁਲਾਕਾਤ ਕਰਨਗੇ ਅਤੇ ਹਾਲਾਤਾਂ ਦਾ ਜਾਇਜ਼ਾ ਲੈਣਗੇ। ਪਹਿਲਗਾਮ ਅੱਤਵਾਦੀ ਹਮਲੇ ਤੋਂ ਬਾਅਦ ਕੇਂਦਰੀ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਵੀ ਪਹਿਲਗਾਮ ਪੁੱਜੇ ਸਨ। ਇਸ ਤੋਂ ਬਾਅਦ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨਾਲ ਸੀਸੀਐਸ ਦੀ ਮੀਟਿੰਗ ਹੋਈ, ਜਿਸ ਵਿੱਚ ਮਹੱਤਵਪੂਰਨ ਫੈਸਲੇ ਲਏ ਗਏ।