IPL 2025: ਆਈਪੀਐਲ 2025 ਦੇ ਆਖਰੀ ਲੀਗ ਮੈਚ ਵਿੱਚ ਮੰਗਲਵਾਰ ਨੂੰ ਰਾਇਲ ਚੈਲੇਂਜਰਜ਼ ਬੈਂਗਲੁਰੂ (RCB) ਨੇ ਲਖਨਊ ਸੁਪਰਜਾਇੰਟਸ (LSG) ਨੂੰ ਛੇ ਵਿਕਟਾਂ ਨਾਲ ਹਰਾ ਦਿੱਤਾ। ਲਖਨਊ ਦੇ ਇਕਾਨਾ ਸਟੇਡੀਅਮ ਵਿੱਚ ਖੇਡੇ ਗਏ ਇਸ ਮੈਚ ਵਿੱਚ ਲਖਨਊ ਵੱਲੋਂ ਕਪਤਾਨ ਰਿਸ਼ਭ ਪੰਤ ਨੇ ਨਾਬਾਦ 118 ਰਨ ਬਣਾ ਕੇ ਸ਼ਾਨਦਾਰ ਇਨਿੰਗ ਖੇਡੀ, ਪਰ ਉਹ ਆਪਣੀ ਟੀਮ ਨੂੰ ਜਿੱਤ ਨਹੀਂ ਦਿਲਾ ਸਕੇ।

RCB ਵੱਲੋਂ ਕਪਤਾਨ ਜਿਤੇਸ਼ ਸ਼ਰਮਾ ਨੇ ਆਖਿਰ ਵਿਚ ਸਿਰਫ 33 ਗੇਂਦਾਂ 'ਤੇ ਧੂੰਆਂਧਾਰ 85 ਰਨ ਬਣਾ ਕੇ ਮੈਚ ਦਾ ਪਾਸਾ ਪਲਟ ਦਿੱਤਾ। ਉਨ੍ਹਾਂ ਨੇ 6 ਛੱਕੇ ਅਤੇ 8 ਚੌਕੇ ਮਾਰੇ। RCB ਨੇ ਲਖਨਊ ਦੇ 227/3 ਦੇ ਜਵਾਬ ਵਿੱਚ 230/4 ਰਨ ਬਣਾਕੇ ਮੈਚ ਜਿੱਤ ਲਿਆ। ਇਹ ਆਈਪੀਐਲ ਇਤਿਹਾਸ ਦਾ ਤੀਜਾ ਸਭ ਤੋਂ ਵੱਡਾ ਸਕੋਰ ਚੇਜ਼ ਹੈ। ਇਸ ਜਿੱਤ ਨਾਲ RCB ਪਵਾਇੰਟਸ ਟੇਬਲ ਵਿੱਚ ਦੂਜੇ ਸਥਾਨ 'ਤੇ ਪਹੁੰਚ ਗਈ ਹੈ। 

228 ਰਨਾਂ ਦੇ ਟਾਰਗੇਟ ਦੀ ਪਿੱਛਾ ਕਰਦਿਆਂ RCB ਨੇ ਤੇਜ਼ ਸ਼ੁਰੂਆਤ ਕੀਤੀ। ਓਪਨਰ ਫਿਲਿਪ ਸਾਲਟ ਨੇ 30 ਰਨ ਅਤੇ ਵਿਰਾਟ ਕੋਹਲੀ ਨੇ 54 ਰਨਾਂ ਦੀ ਅਰਧਸ਼ਤਕ ਪੂਰਾ ਕੀਤਾ। ਹਾਲਾਂਕਿ ਦਰਮਿਆਨ ਵਿੱਚ LSG ਨੇ ਵਾਪਸੀ ਕਰਦਿਆਂ ਰਜਤ ਪਾਟੀਦਾਰ (14) ਅਤੇ ਲਿਆਮ ਲਿਵਿੰਗਸਟੋਨ (0) ਨੂੰ ਤੀਜੇ ਤੇ ਚੌਥੇ ਨੰਬਰ 'ਤੇ ਖੇਡਦਿਆਂ ਜਲਦੀ ਆਊਟ ਕਰ ਦਿੱਤਾ। LSG ਵੱਲੋਂ ਵਿਲੀਅਮ ਔਰੂਕ ਨੂੰ ਦੋ ਅਤੇ ਆਕਾਸ਼ ਮਹਾਰਾਜ ਸਿੰਘ ਤੇ ਆਵੇਸ਼ ਖਾਨ ਨੂੰ ਇੱਕ-ਇੱਕ ਵਿਕਟ ਮਿਲੀ।

ਇਸ ਤੋਂ ਪਹਿਲਾਂ ਟੋਸ ਹਾਰ ਕੇ ਪਹਿਲਾਂ ਬੈਟਿੰਗ ਕਰਨ ਉਤਰੀ LSG ਨੇ ਨਿਰਧਾਰਿਤ 20 ਓਵਰਾਂ ਵਿੱਚ 3 ਵਿਕਟ ਗਵਾ ਕੇ 227 ਰਨ ਬਣਾਏ। ਟੀਮ ਵੱਲੋਂ ਮਿਸ਼ੇਲ ਮਾਰਸ਼ ਅਤੇ ਮੈਥਿਊ ਬ੍ਰੀਟਜ਼ਕੇ ਨੇ ਬੈਟਿੰਗ ਦੀ ਸ਼ੁਰੂਆਤ ਕੀਤੀ। ਪਹਿਲਾ ਝਟਕਾ ਬ੍ਰੀਟਜ਼ਕੇ (14) ਨੂੰ ਮਿਲਿਆ, ਜੋ ਕਿ ਤੂਸ਼ਾਰ ਨੇ ਬੋਲਡ ਕੀਤਾ। ਮਿਸ਼ੇਲ ਮਾਰਸ਼ ਨੇ ਤੇਜ਼ੀ ਨਾਲ 37 ਗੇਂਦਾਂ 'ਤੇ 67 ਰਨ ਬਨਾਏ, ਜਿਸ ਦੀ ਸਟਰਾਈਕ ਰੇਟ 181.08 ਸੀ। 

ਤੀਜੇ ਨੰਬਰ 'ਤੇ ਕਪਤਾਨ ਰਿਸ਼ਭ ਪੰਤ ਨੇ ਨਾਬਾਦ ਸ਼ਤਕ ਪਾਰੀ ਖੇਡੀ। ਉਨ੍ਹਾਂ ਨੇ 61 ਗੇਂਦਾਂ 'ਤੇ ਨਾਬਾਦ 118 ਰਨ ਬਣਾਏ, ਜਿਸ ਦੌਰਾਨ 11 ਚੌਕੇ ਅਤੇ 8 ਛੱਕੇ ਮਾਰੇ। ਇਸਦੇ ਨਾਲ-ਨਾਲ, ਨਿਕੋਲਸ ਪੂਰਨ (13) ਅਤੇ ਅਬਦੁਲ ਸਮਦ (1) ਵੀ ਨਾਟ ਆਊਟ ਰਹੇ।

ਪਰ ਮਯੰਕ ਅਗਰਵਾਲ ਅਤੇ ਜਿਤੇਸ਼ ਸ਼ਰਮਾ ਦੀ ਨਾਬਾਦ ਤੇਜ਼-ਤਰਾਰ ਭਾਗੀਦਾਰੀ ਨੇ RCB ਨੂੰ ਜਿੱਤ ਦਿਲਾ ਦਿੱਤੀ। ਅਗਰਵਾਲ ਨੇ 23 ਗੇਂਦਾਂ 'ਤੇ 41 ਰਨ ਬਣਾਏ ਜਦਕਿ ਜਿਤੇਸ਼ ਸ਼ਰਮਾ ਨੇ 33 ਗੇਂਦਾਂ 'ਤੇ ਧੂੰਆਂਧਾਰ 85 ਰਨ ਜੜੇ। ਉਸੇ ਸਮੇਂ, RCB ਵੱਲੋਂ ਨੁਵਾਨ ਤੂਸ਼ਾਰਾ, ਭੁਵਨੇਸ਼ਵਰ ਕੁਮਾਰ ਅਤੇ ਰੋਮਾਰੀਓ ਸ਼ੈਫਰਡ ਨੂੰ ਇੱਕ-ਇੱਕ ਵਿਕਟ ਮਿਲੀ।